Ki Wali Kumam dega saula-saula go nebut so semu go no taitisuey gabe pupu! Kemtuik nebut Nemot lo semu dali go gabe. Ngge imot nogo so asi-babu lo duono-duono itak go taut gabe.
“Kamus Kemtuik” nebut 3 ba no semu go, Kemtuik-Indonesia-Inggris, imot go denok seguola sogo, amble nebut sesenong go, Ingglis nebut so sesenong go nogo teguop so tebok genang gabe. Kamus ngge nemot go dikuoytap gabe, seni-seni sikabung Kemtuik amble ku lo susuing go tebok genang. Yang, kamus ngge lemoy go, imot go Perpustakaan ngga, yakena nogo, daerah, nasional nggano internasional nogo mea tebok dali.
Yayasan Kerjasama Pelayanan Melalui Bahasa Ibu (PELIBU) go sui no, taitisuey atnang logo gabe pupu, ayanang Kamus ngge so yaluim go, yagui 1975-2008, aya Jaap van der Wilden, mia Jelly van der Wilden, mia Margaret Hartzler, nay Ortenci Yaboisembut, aya Johan Yekuisamon, aya Jacob Bemey, nay Yuliana Marasian, nggano andua-andua temu nogo gabe pu dali.
Kua kay dali taitisuey Uncen-Sil ngga SIL Internasional lo tandali-tandali mo motdak ngga ey 'latihan' ey 'lokakarya' ey da mata so atnang nogo mo tebok. Ngga ey teguop sogo taitisuey aya Dr. René van den Berg, kamus ngge so sesemu go nogo atuiamangking kunalamata so mo iti. Nggano, aya Racfri Kirihio Kamus 'cetak' genang so suey so mo semu, nggano cetak genang sogo pemerintah sik sogo duoy tap mo usey.
Ngga tang sogo so, Yayasan Kerjasama Pelayanan Melalui bahasa Ibu (Pelibu) suey takokong ey taitisuey Pemerintah, Kabupaten Jayapura, Habel Melkias Suwae, S.Sos, MM ey Wakil Bupati Zadrak Wamebu, SH, MM. (2007-2012) eygo nogo taitisuey gabe pupu. Nggano, suey takong ey aya Bupati Jayapura imening kuoy go nogo gabe pupu dali. Teguop seni sogo taitisuey wengkabui Balitbangda Kabupaten Jayapura “ngayo” Alexander Leonard Griapon nogo, nggano Kabid Litbang dem Otovianus Tabisu ey nemot go 'staf' eygo nogo gabe pupu dali.
Taitisuey dali aya wekabui Percetakan dabui yakay ey Kamus Kemtuik nebut 3 ba no ngga yaitu, Kemtuik-Indonesia-Ingris, Kemtuik- Indonesia nggano Kemtuik-Inggris no mo semu go.
I go sogo, sikabung Kemtuik 11.000 yam sogo, bluem; Kemtuik, Klisi, Mlap nggano Moy, logo suey takong ey tong kua-tong goso taitisuey asi-babu nogo gabe pupu, yangga: Mamui, Tato, Asi, Babu, Mia-ayanang nebut ngge mo iti go weng go duono-duono itak go sogo taitisuey gabe pupu dali.
Denok nogo sogo nebut gabe pepen dali: “Nebut yay suey so se susuing! Duo no-duono suey so, seni so, nenguon so, se iitak klong. Ngganang sogo, yab ba nogo, saliyap nogo, sikabung temu eygo, blueu kebali ba nogo, Kemtuik nebut so se pepen.” Wali-wali!
Ki Wali Kumam go guala-klum ba no suey gemang!
Yayasan Pelibu
Ketua Umum
Pdt. Jacob Bemey, B.Th,S.Si
