KEMTUIK NOGO NEBUT
Kemtuik sui pu go ngga sedue Kemtuik tang go maning suey so kua pepen gabe. Aya Bawa Yotam Baylam lo pen go, "Kemtuik ngga wi lo pu go. Tui..., tui..., tui, tuguiy-a tui!" No, aya Imon Titus Malasiang lo pen go, "Kemtuik sui ngga, "Tuik" sik so iti go. Tuik ngga nemot go seni, "iram tuik go" Indonesia nebut sogo "pelantikan". No, Tuik ngga, nemot go seni meno, tegut tuik so pu go, nggano, kim tuik goso pu go".
No, at go mia lo genam no pen go, Kemtuik sui ngga saula meno ngga bu lo-biap lo pu go, "Metuik lo susuing go sedue kabung." Ngga tang sogo so, imot sogo Kemtuik saula so gabe pu." Metuik nemot go seni, Ketui lo susuing go sikabung. Ngga Kemtuik sui pu go nogo pen go gemang.
Kemtuik go yakena-yakena ngga, Demutim, Mlem, Kebeu, Seblom, Banu, Blasu, Wawit, Ambea, Seguolip, Sawiron, Suiapsisa, Demusuo, Suiap, Sewi, Aip, Blamwali, Kebeu, Wasio, Saplung, Mamda-yawang, Kungday, Mamsa-samon, Mamda-dumadi. Nggano, Meikari, Sedingudong, Buglang, Yekui, Kuansu, Klipkau, Smaglang ngge, sedue kabung Kemtuik, no Mlap nebut so pepen go tang.
Nemot-a seni so lo, Kemtuik kabung ngga, Mlem Yanim so pu go. No, Kleku Woysru-Banusru, mlap woysru-banosru, nggano, Ikuoy naklay lo Kemtuik nebut gabe pepen. No, Kemtuik sedue kabung ngge Gemle bu ketang ngga idi ey ngge idi ey golo gemang susuing. Nemotnang yakay ey, Kemtuik Nebut sogo Deguo Teguop mo lemoy go. Nggano, nggeasui go, Kemtuik go Website gabe mo semu, tanggal 9 Noperber 2012 no, PKB GKI go HUT no daklaya tete sogo kemtuikmedia.net gabe lemoy.
Seni so ngga seni eygo ku, Kemtuik sikabung nogo sogo. Ngga tang so, yaguino-yagui no taitisuey Ki Wali Aya ey Blong Dem Yesus ey, Ki Wali Waglo ey go nogo se keklak. Tong kua to!
Nebut ng kuduong so yatrang so internet ba no degut genang so klik go gabe. Nemot-a piam-piam so klik go, no, yakay kangok.
Sam so klik go:
Aya Jacob Bemey ey
Denun Yulianan Malasiang eygo lo.
