Glime bu ngga, bu kangok go. Kemtuik, Klesi, Namblong lo koklong go bu. Seni so, bu ngge kua nungglong. denoktiat lo keyung go kalik so senang so mea ikum. No, woy kangok go pli golo bu ngge yakua pang dali.
Glime bu Kemtuik Nogo, Yakena Mamda, Meikali, bugglang, Kuansu, ngga ey Yanim sedue kabung lo ngga nogo: bu mea wata, amka-piring bu mea lu, tennang sogo mea suik dali.
Seni so! Kemtuik, Klesi, Namblong sogo, saula meno logo Glime Sikabung so mea usi dali. Glime bu ngge kangok kua, no banim go Tamot Ishack Samuel Kenye lo usam seruling Emas ba nogo klik go tang so yaken-yakena Papua usam, "Gglime bu ket so dagu so" mo senong. yakena ket sik sogo nemotnang lo duing go Glime bu ngga Blanda so. Nemot-a imot go bu. Nnga tang so sikabung glime bu ketang lo suing go Glime sikabung so saula meno logo mea usi dali.
I.S.Kinje lo usam Glime bu sogo sedi ba no ikum go kalik so nomot lo mo klik. No seni so, usam ngge nemot go seni kangok dega. Ki Wali Neguet lo nemot bano li gono nemu ket sono go, sikabung lo kua ikum go nemot lo mo ikum. Ngga tang so usam balo nemot go seni mo klik. Nggeasui go nemot go seni, dia sono go gabe i-ikum. No seni so, ngga diding ba lo.
Glime bu nogo nebut maning suey so kua nebuem! Nando Sikabung lo sam ngge mo ikum go! Tebok genang, ngga no tandali suey genang sogo duing go, se pen dali! email ngge no: marasiany@yahoo.com
Suey Wali-Wali!
